كيكة مزينة بالمكسرات

طريقة الكيك

أول حاجة كنصاوبو الكريمة لي غنحشيو بها الكيك ومقاديرها هي
2 كيسان عنبة حليب
3معالق كبار سكر سندة (سكر حبيبات)
3معالق كبار كاكاو مر
2 معالق كبار مايزينة لي هي النشاء
2 سشيات فاني (فنيلا)
ملعقة صغيرة قهوة سريعة الدوبان
كنخلطو كولشي مزيان ونديروه فكسرونة فوق النار تا يعقاد ونزيدو عليه ملعقة كبيرة زبدة نكبوها فزلافة ونغطيوها بالسولوفان ونوضعوها فالتلاجة تبرد
مقادير الكيك
4بيضات
كأس عنبة سندة
كأس عنبة زيت
كأس يوغورت بنكهة الفنيلا
2 خمارات (ولي هي البكن باودر )
1 فاني (فنيلا)
قبصة ملح وملعقة كبيرة خل
2 كيسان دقيق
كنخلطو الكيك عادي ونضيفو الدقيق تا نحصلو على خليط ماتقيل ما خفيف ونكبوه فمول مدهون بالزبدة ومرشوش بالدقيق وكناخدو أي مكسرات عندنا من زبيب ولوز وكركاع وحبيبات الشكلاطة نخلطوهوم مع بعضياتهوم ونفرتتوهوم فوق الكيك وندخلوها الفرن باش طيب.
ونحظرو السيرو ب كأس عنبة ماء 2معالق سكر وقليل من عصير الحامض على النار يغلا جيدا .
ملي طيب الكيكة نقسموها على جوج نسقيوها بالسيرو ونديرو الكريم لي حظرنا ونديرو النصف الآخر ديال الكيك نسقيوه بشوية من السيرو ونزينوها بالكرميل الجاهز إختياري

ملاحظة (كأس العنبة هو الكأس لي كنعبر بيه ولي وزنه 150غ)