فن تزيين الكيك : طريقة حشو وتغطية الكيك بالكريمة بالصور

السلام عليكم ورحمة الله وبركاته

موقع أم سيرين لكل ما يهم السيدة العربية يقدم فن تزيين الكيك : طريقة حشو وتغطية الكيك بالكريمة بالصور

وصفة الاخت أم كنزة جزاها الله خيرا

لتحضير الجنواز اقرئي هذا الموضوع
الطريقة الناجحة لتحضير كيك الجنواز بالخطوات المصورة

لتحضير كريمة الزبدة اقرئي هذا الموضوع 

طريقة عمل كريمة الزبدة لتزيين الكيك بالصور المشروحة

درس ديالنا غادي اكون كيفية حشو الكيك ديالنا و تغطيته بالكريمة بطريقة سهلة

أول حاجة غادي ناخدو بوش {جيب الحلواني} و نوضعو فيه الكريمة ديالنا, حاولو ما تعمروهش بزاف باش ما تخرجش لينا الكريمة من 

الفوق .

اسهل طريقة باش تعمرو البوش هي توضعوها وسط كاس كبير .

أنا استعملت الدوي رقم 12 الى ما كانتش متوفرة قطعي غي البوش ولكن غي قطعة صغيرة.

خدو كارتونة و غلفوها بورق الومنيوم او لي عندها ديال الحلويات واجدة احسن, و ديرو شوية من الكريمة كيف باين في الصورة , باش الكيك إلصق و ما يميلش ليكم 

خدو واحد الطبقة من الجنواز و من الاحسن تكون الطبقة لي كانت في الفوق باش الى كان شي عيب ما يبانش.

اسقيوها مزياااان بالسيرو باش ما تجيكومش ناشفة .

{السيرو : 100 مل ماء + 100 غ سكر غير اغلاو و طفي عليهم , يمكن تنسمو بالنكهة لي بغيتو }

ملحوظة : ما تخليوش السيرو حتى اتعسل حيت كيقصاح في الكيكة الى دخلناها للثلاجة , غي اغلا صافي وطفيو عليه.

و بداو كيف ما باين في الصورة ديرو الكريمة بنفس الطريقة .

ثم سرحو الكريمة بالسباتول

عاودو نفس الطريقة , حطو الطبقة الوسطى من الجنواز , و سقيوها مزيان بالسيرو ثم وضعو الكريمة.

هاد الطريقة من وضع الكريمة كتكون ساهلة و كاتكون طبقات الكريمة متساوية في الكيك ماشي طبقة فيها كريمة بزاف و طبقة فيها غي شوية .

حطو الطبقة الاخيرة من الجنواز و هي الطبقة لي كانت التحت, حيت دائما كاتكون مستوية و من الاحسن تكون هي الفوق باش الكيكة ديانا يكون سطحها مستو .

سقيوها كدلك بالسيرو , و هاد المرة وضعو طبقة خفيفة من الكريمة ماشي بحال الطبقات لي قادينا ,غي شوية من الكريمة

و حاولو تنزلوها للجناب بواسطة السباتول

سرحوها بشوية بشوية و حاولو الكريمة تكون مستوية على الكيكة كاملة

حتى توصلو لهاد النتيجة

كيف قلت طبقة الكريمة خصها تكون غي خفيفة , عرفتو علاش؟

باش ملي نغلفو الكيكة ديالنا بعجينة السكر تاخد لينا شكل الكيكة لي هو مستقر , اما الكريمة تقدر دوب و اخسر لينا الشكل النهائي.

داكشي علاش غا نحتاجو فقط طبقة خفيفة من الكريمة غي باش تلصق لينا عجينة السكر فوق الكيك.

ويمكن لينا نعوضوها بنوتيلا مثلا, المهم لي اخلي لينا عجينة السكر تثبت فوق الكيك .

ملي توصلو لهاد النتيجة دخلو الكيكة ديالكم تبرد شوية والكريمة تشد.

ترقبو المزيد من دروس الاخت ام كنزة الخاصة بتزيين الكيك بعجينة السكر في المواضيع القادمة ان شاء الله
في امان الله